नवी दिल्ली :

भारताने १९७१ साली पाकिस्तानवर मिळविलेल्या विजयाचे प्रतिक म्हणून उभारण्यात आलेली इंडिया गेटवरील अमर जवान ज्योतीची ज्योत 50 वर्षांनंतर विझविली जाणार आहे.

शुक्रवारी इंडिया गेटजवळील राष्ट्रीय युद्ध स्मारक येथील ज्योतीमध्ये अमर जवान ज्योतीच विलीन होणार असल्याचे लष्करी अधिकाऱ्यांनी सांगितले.

अमर जवान ज्योती १९७१ च्या भारत-पाक युद्धात कारवाईत शहीद झालेल्या भारतीय सैनिकांचे स्मारक म्हणून बांधण्यात आले होते. भारताने हे युध्द जिंकल्यामुळे बांगलादेशची निर्मिती झाली. 26 जानेवारी 1972 रोजी तत्कालीन पंतप्रधान इंदिरा गांधी यांच्या हस्ते अमर जवान ज्योतीचे उद्घाटन झाले होते.

लष्करी अधिकाऱ्यांनी गुरुवारी सांगितले की अमर जवान ज्योतीची ज्योत शुक्रवारी दुपारी विझवली जाईल आणि इंडिया गेटच्या पलीकडे फक्त 400 मीटर अंतरावर असलेल्या राष्ट्रीय युद्ध स्मारकात विलीन होईल.

पंतप्रधान नरेंद्र मोदी यांनी 25 फेब्रुवारी 2019 रोजी राष्ट्रीय युद्ध स्मारकाचे उद्घाटन केले होते, जिथे 25,942 सैनिकांची नावे ग्रॅनाइटच्या गोळ्यांवर सुवर्ण अक्षरात कोरलेली आहेत.