पुणे :

गणेशखिंड येथिल माॅडर्न महाविद्यालयातील राष्ट्रीय सेवा योजना शिबीर या वर्षी जिल्हा परिषद प्राथमिक शाळा लवार्डे तालुका मुळशी जिल्हा पुणे येथे पार पडले.

या शिबिराचे उद्घाटन प्रथम नागरिका सुनंदा संभाजी चवले उदयोजिका व सरपंच लवार्डे ,  योगेश दत्तात्रेय निंबाळकर (उपसरपंच, लवार्डे) यांच्या हस्ते झाले. याप्रसंगी डॉ. संजय खरात (प्राचार्य मॉडर्न कॉलेज गणेशखिंड),डॉ. प्रकाश दीक्षित, (उपकार्यवाह, पी ई सोसायटी)यांच्या हस्ते झाले.

सरपंच मा सुनंदा चवले यांनी विद्यार्थ्यांना मातीतील उद्योजक व्हा व मातीशी नाळ जपा असे आवाहन केले. शिबिरात डॉ. सतीश अंबिके(डिजिटल लिटरसी), डॉ. ज्योती गगनग्रास (उपप्राचार्य) व डॉ. शुभांगी जोशी (उपप्राचार्य) यांनी युवकांची व्यसनाधीनता युवा पिढी आणि उद्योजकता यावर तर प्रा. स्वाती कंधारकर (उपप्राचार्य) यांनी वेदिक मॅथेमॅटिक्सवर व्याख्यान दिले.

डॉ. शुभांगी भातांब्रेकर यांनी सायबर सेक्युररिटी यावर मार्गदर्शन केले. प्रा. विजयालक्ष्मी कुलकर्णी व फ्युचर बँकर्स फोरम टीम आणि जाणीव यांनी आर्थिक साक्षरता सर्वेक्षण केले. मोहसीन शेख (दै. पुढारी),  केदार कदम (पुणे बुलेटिन), महेश कचरे पाटील (मॅक न्यूज) यांनी युवकांचे सामाजिक भान यावर मार्गदर्शन केले.

वृक्षारोपण, ग्राम स्वच्छता, प्लॅस्टिक कलेक्शन, सर्वेक्षण, आरोग्य शिबीर यासारखे कार्यक्रम शिबिरात घेतले गेले. रोज सायंकाळी सांस्कृतिक कार्यक्रम घेतले गेले.

मंदिर परिसर स्वच्छता, शाळेभोवतालची स्वच्छता, रस्ते तयार करणे, ग्रामसफाई, श्रमदान, प्रबोधनपर व्याख्याने, पथनाट्ये, मुल्यशिक्षण, गटचर्चा, विविध सांस्कृतिक कार्यक्रम, मनोरंजनात्मक खेळ, विविध गुणदर्शनाचे कार्यक्रम अंधश्रध्दा निर्मूलन, शालेय मुलांसाठी कार्यक्रम व गावाचे सर्वेक्षण इ.कार्यक्रम घेतले गेले. नदीवर बंधारा बांधला आणि डाॅ अश्विनी महाजन व व्हाईट अँड ट्रस्ट फाॅर्म्यासुटीकल लि. यांनी नेत्रतपासणी शिबीर घेतले.

विद्यार्थ्यी अत्यंत आनंदाने व मोठ्या संख्येने त्यांच्या सांस्कृतिक कार्यक्रमात सहभागी झाले विद्यार्थ्यांना ग्रामस्थांनी आपलंसं करून घेतलं व आयुष्यभराचे ऋणानुबंध गावाशी तयार झाले त्याबद्दल सर्व ग्रामस्थांचे मनापासून आभार .

या शिबिराचे काम प्रा. कुमोद सपकाळ, कार्यक्रम अधिकारी, डाॅ. मंजुषा कुलकर्णी सहकार्यक्रम अधिकारी, डाॅ गोविंद कांबळे, सहकार्यक्रम अधिकारी यांनी पाहिले. त्यांना चारूदत्त काटे, सतिश दोडके, ऋषिकेश शेडगे यांनी मदत केली. प्राचार्य डाॅ. संजय खरात यांच्या मार्गदर्शनाखाली शिबीर पार पडले.

पुणे :

महाराष्ट्रात गेल्या काही दिवसांपासून हिट अँड रनच्या घटना वाढताना दिसून येत आहेत. पुण्यात काही महिन्यांपूर्वी घडलेल्या अपघाताने देशभर खळबळ उडाली होती. अल्पवयीन मुलाने दारूच्या नशेत कारने दोघांना चिरडले होते. त्यानंतर या घटना लगातार होताना दिसून आल्या. अशात पुण्यात आणखी एक भीषण अपघात घडला आहे. पुण्यातील वाघोली परिसरात पुन्हा एक हिट अँड रनचा प्रकार घडलाय. यामुळे एकच खळबळ उडालीये.

वाघोली परिसरात फुटपाथवर झोपलेल्या ९ जणांना डंपरने चिरडल्याची धक्कादायक घटना पुण्यात घडली. यात 3 जणांचा जागीच मृत्यू झालाय. या दुर्घटनेतील मृतांमध्ये दोन बालकांसह त्यांच्या काकाचा समावेश आहे. तर सहा जण गंभीर जखमी झाले आहेत. या जखमींमधील तिघांची प्रकृती चिंताजनक आहे.

नेमकं काय घडलं?

वाघोली येथील केसनंद फाट्यावरुन पुण्याच्या दिशेने येताना हा अपघात घडला. रात्री 12 ते 1 च्या सुमारास वाघोली चौकातील वाघोली पोलीस ठाण्यासमोरच ही घटना घडली. मिळालेल्या माहितीनुसार, बिल्टवेल इंटरप्राईजेस कंपनीचा हा डंपर असून डंपर चालक मद्यधुंद अवस्थेत असल्याची माहिती आहे.

फुटपाथवर झोपलेले कामगार हे अमरावतीहून पुण्यात कामासाठी आले होते. अपघात घडला त्यावेळी फुटपाथवर 12 जण झोपले होते. तर काहीजण फूटपाथच्या बाजूला असलेल्या झोपडीत झोपले होते. गाढ झोपेत असतानाच काळाने त्यांचा घात केला. या अपघातात तिघांचा जागीच मृत्यू झालाय.

तर, जखमींना तातडीनं ससून रुग्णालयात दाखल करण्यात आलंय. अपघातात जखमी झालेले सर्व कामगार रविवारी रात्रीच अमरावती येथून कामासाठी आले होते.अशी माहिती समोर येत आहे.

पुणे :

अमली पदार्थ तस्कर ललित पाटील आरोपी असलेल्या अमली पदार्थ उत्पादन प्रकरणी चाकण पोलिस ठाण्यात दाखल गुन्ह्याच्या खटल्याच्या सुनावणीला खेड न्यायालयात सुरुवात झाली आहे.

गुन्हे शाखेच्या अमली पदार्थ विरोधी पथकाने खेड तालुक्यात सात ऑक्टोबर २०२० ला २० किलो मेफेड्रोन (एमडी) पकडले होते. या गुन्ह्यात ललित पाटीलसह एकूण २२ जणांना अटक करण्यात आली होती. या प्रकरणात ललित पाटीलसह वीस जणांवर गुन्हे दाखल असून, त्यांच्याविरोधात ऑक्टोबरमध्ये आरोपपत्र दाखल करण्यात आले आहे.

यापैकी आठ आरोपींना मुंबई उच्च न्यायालयाने जामीन मंजूर केला आहे, तर उर्वरित बारा आरोपी अद्याप येरवडा कारागृहात न्यायालयीन कोठडीत आहेत. या खटल्याच्या सुनावणीत सरकार पक्षाने तक्रारदार पोलिस अधिकारी शकीर गोसोद्दीन जेनेडी यांची साक्ष नोंदवली.

पिंपरी-चिंचवड पोलिसांनी एका कारमधून २० किलो मेफेड्रोन पकडले होते. त्यातून अमली पदार्थ निर्मिती व तस्करीचे मोठे रॅकेट उघडकीस आले. तपासादरम्यान आरोपींनी रांजणगाव येथील कंपनीत तब्बल १३२ किलो आणि रायगड जिल्ह्यातील महाड येथे दहा पंधरा किलो एमडी तयार केल्याची धक्कादायक माहिती समोर आली.

या प्रकरणात पोलिसांनी ललित पाटीलसह एकूण २२ जणांना अटक केली होती. यांच गुन्ह्यात ललित पाटील ससून रुग्णालयात उपचार घेत असताना अमली पदार्थाची तस्करी करत असल्याचे उघडकीस आले होते

या गुन्ह्याच्या तपासात पोलिसांनी अमली पदार्थ जप्त करून त्यापैकी न्यायालयात सादर केलेल्या नमुन्यांचे न्यायवैद्यक प्रयोगशाळेत रासायनिक विश्लेषण केले नसल्याने अमली पदार्थ प्रतिबंधक कायद्याच्या (एनडीपीएस) तरतुदींची पूर्तता झाली नसल्याने मुंबई उच्च न्यायालयाने आठ आरोपींना गेल्या महिन्यात जामीन मंजूर केला होता.

मेफेड्रोन पकडल्याची कारवा ‘इ कशी झाली, त्यावेळी कोणत्या आरोपींना ताब्यात घेण्यात आले होते, यासह कारवा ‘इचा घटनाक्रम जेनेडी यांनी साक्षीत सांगितल्याची माहिती या खटल्यातील विशेष सरकारी वकील शिशीर हिरे यांनी दिली. पुढील सुनावणी २७ नोव्हेंबरला होणार आहे.

पुणे :

अखिल भारतीय वारकरी मंडळाचे राष्ट्रीय
अध्यक्ष ह.भ.प. प्रकाश बोधले महाराज यांच्या
अध्यक्षतेखाली बापूसाहेब ज्ञा.कंद यांची हवेली
तालुका अध्यक्ष पदी बिनविरोध निवड करण्यात
आली.

बापूसाहेब कंद यांना अखिल भारतीय वारकरी
मंडळाच्या पदाधिकार्यांच्या हस्ते निवडीचे पत्र
देण्यात आले. हवेली तालुक्यात एक उत्तम उद्योजक
आणि अध्यात्माचे संस्कार जनमानसात रुजवणारा
एक वारकरी म्हणून त्यांची सर्वत्र ख्याती आहे.
त्यांच्यावर अभिनंदनाचा वर्षाव होत आहे.

पुणे जिल्हा परिषदेचे माजी अध्यक्ष प्रदीप कंद,
खाण क्रशर संघटनेचे सर्व पदाधिकारी, पुणे जिल्हा
परिषदेचे माजी सदस्य रामभाऊ दाभाडे, कमल बाग
सोसायटीचे चेअरमन तथा उद्योजक संतोष देशमुख
आदींनी त्यांचे अभिनंदन केले आहे.

अखिल भारतीय वारकरी मंडळाच्या माध्यमातून
तालुक्यात अध्यात्माचे संस्कार रुजवण्यासाठी
यापुढील काळात विविध सामाजिक बांधिलकीचे
उपक्रम राबवणार असल्याचे बापूसाहेब कंद यांनी
सांगितले.

पुणे :

पुण्यातील बोपदेव घाटात युवतीवर बलात्कार प्रकरणानं संताप व्यक्त होतोय. या घटनेतील तीन नराधम पोलिसांना गुंगारा देत अद्याप मोकाट फिरतायेत. ५ दिवसांपासून पोलिसांच्या तपासाला पुर्णपणे अपयश आलंय. म्हणूनच आता आरोपींना शोधण्यासाठी १० लाखांचं बक्षिस जाहीर करावं लागलं.

गेल्या काही दिवसांपासून पुण्यात कायदा सुव्यवस्थेचे तीन तेरा वाजलेत. ड्रग्ज तस्करी, कोयता गँगचा धुमाकूळ, हिट अँण्ड रनच्या घटनांनी पोलिसांच्या कर्तव्यावर बोट ठेवलं जातंय. पुण्यातील वाढती गुन्हेगारी चिंतेचा विषय बनलाय. बोपदेव घाटात युवतीवर बलात्कार प्रकरणानं त्यात भर पडलीये. या घटनेतील तीन नराधम पोलिसांना गुंगारा देत अद्याप मोकाट फिरतायेत. ५ दिवसांपासून पोलिसांच्या तपासाला पुर्णपणे अपयश आलंय. म्हणूनच आता आरोपींना शोधण्यासाठी १० लाखांचं बक्षिस जाहीर करावं लागलं.

पुण्यातील २१ वर्षीय तरुणी तिच्या मित्रासह बोपदेव घाटात फिरायला गेली होती. तिथेच एका आरोपीने त्यांना मारहाण केली. त्यानंतर त्याच्या इतर दोन मित्रांना बोलावून तरुणीवर लैंगिक अत्याचार केला. यावेळी तिच्या मित्राला एका झाडाला शर्ट आणि पट्ट्याने बांधून ठेवले होते, अशी माहिती पीडित तरुणांनी पोलिसांनी दिली.

पुण्यातील बोपदेव घाटात युवतीवर बलात्कार प्रकरणात पोलिसांना आतापर्यंत आरोपींचे CCTV हस्तगत करण्यात यश मिळावे आहे. प्राप्त झालेल्या सीसीटीव्हीच्या आधारे पोलिसांनी आरोपींचे स्केच तयारही करण्यात आले आहे. एवढेच नाही तर २०० पेक्षा अधिक संशयितांची पोलिसांनी चौकशी केली असून ३ हजार मोबाईल क्रमांकांची तपासणी झालेली आहे. सध्या पोलिसांनी पुण्यातील बोपदेव घाटात युवतीवर बलात्कार प्रकरणात आरोपींच्या शोधासाठी चक्क AI ची मदत घेण्याची ठरवली आहे

पुणे :

नवरात्रोत्सवात दांडिया आणि गरबा खेळण्याच्या ठिकाणी महिलांच्या छेडछाडीचे प्रकार घडल्यास कडक कारवाई करण्याचा इशारा पोलीस आयुक्त विनयकुमार चौबे यांनी दिला आहे. नवरात्रोत्सवाच्या काळात गर्दीच्या ठिकाणी कोणताही गैरप्रकार होऊ नये, यासाठी पोलीस ठाणे, गुन्हे शाखेतील अधिकारी आणि कर्मचारी यांनी पायी गस्त घालण्याचे आदेशही पोलीस आयुक्तांनी दिले आहेत.

नवरात्रोत्सव उत्सवाच्या पार्श्वभूमीवर पोलीस आयुक्त चौबे यांनी तिन्ही परिमंडळ कार्यालयांमध्ये भेट देऊन आढावा घेतला. आयुक्तालयाअंतर्गत येणाऱ्या १८ पोलीस ठाण्यातील प्रभारी अधिकाऱ्यांनाही त्यांनी सूचना दिल्या. यावेळी पोलीस उपायुक्त संदीप डोईफोडे, विशाल गायकवाड, स्वप्ना गोरे, डॉ. शिवाजी पवार, सहायक पोलीस आयुक्त सचिन हिरे, मुगुटलाल पाटील, राजेद्रसिंह गौर यावेळी उपस्थित होते.

नवरात्र उत्सवामध्ये दांडिया खेळण्याच्या ठिकाणी आणि आजूबाजूच्या परिसरात आवश्यक तो बंदोबस्त लावण्यात यावा. हद्दीतील उद्याने, मोकळी मैदाने, सार्वजनिक गर्दीची ठिकाणे या जागी गस्त घालावी. गर्दीच्या ठिकाणी मोकाट जनावरे फिरणार नाहीत, याची दक्षता घ्यावी, अशाही सूचना पोलीस आयुक्त चौबे यांनी दिल्या.

नवरात्रौत्सवाच्या काळात अनेक ठिकाणी गर्दी होत असते. गर्दीच्या ठिकाणी कोणताही अनुचित प्रकार घडू नये, यासाठी दक्षता घेण्याचेही आदेश पोलीस आयुक्तांनी दिले आहेत. त्यानुसार दररोज गर्दीच्या ठिकाणी पोलीस ठाणे तसेच गुन्हे शाखेतील अधिकारी आणि कर्मचारी यांनी पायी गस्त घालावी, अशा सूचना दिल्या आहेत.

*नवरात्र मंडळांना सूचना*

नवरात्रौ मंडळांनाही सुरक्षिततेसाठी उपाययोजना करण्याच्या सूचना पोलीस आयुक्तांनी दिल्या आहेत. त्यानुसार ‘सीसीटीव्ही’ कॅमेरे लावावेत, देवीची मूर्ती असलेले ठिकाण आणि दांडिया खेळण्याच्या ठिकाणी मंडळांनी स्वयंसेवक नेमावेत, असे सुचविण्यात आले आहेत. उत्सव शांततेत होण्यासाठी नागरिकांनी सहकार्य करण्याचे आवाहनही पोलीस आयुक्त चौबे यांनी केले आहे.

पुणे :

पश्चिम महाराष्ट्रातील पर्यावरणस्नेही 1 लाख 94 हजार 898 वीजग्राहकांनी छापील कागदाचा पूर्णपणे वापर बंद करीत पेपरलेस वीजबिलास राज्यात सर्वाधिक पसंती दिली आहे. यासाठी महावितरणच्या ‘गो-ग्रीन’ योजनेत सहभागी झाल्याने या ग्राहकांना वार्षिक 2 कोटी 33 लाख 87 हजार 760 रुपयांचा फायदा होत आहे.

महावितरणच्या ‘गो-ग्रीन’ योजनेनुसार छापील वीजबिलाच्या कागदाऐवजी फक्त ‘ई-मेल’ व ‘एसएमएस’चा पर्याय निवडल्यास प्रतिबिल व प्रतिमहिना 10 रुपये सवलत देण्यात येत आहे. त्यामुळे योजनेत सहभागी ग्राहकांची वीजबिलांमध्ये वार्षिक 120 रुपयांची बचत होत आहे. त्यानुसार वीजबिलांसाठी छापील कागदाचा पूर्णपणे वापर बंद करीत पश्चिम महाराष्ट्रातील तब्बल 1 लाख 94 हजार 898 पर्यावरणस्नेही वीजग्राहकांनी केवळ ‘ई-मेल’ व ‘एसएमएस’चा पर्याय निवडला आहे. या योजनेत आतापर्यंत राज्यातील 4 लाख 87 हजार 113 वीजग्राहकांनी सहभाग घेतला आहे. त्यामध्ये सर्वाधिक 40 टक्के ग्राहक पश्चिम महाराष्ट्रातील आहेत. तर पुणे परिमंडलातील 1 लाख 30 हजार 761 ग्राहक राज्यात सर्वाधिक संख्येने या योजनेत सहभागी झाले आहेत.

आधुनिक जीवनशैलीशी सुसंगत ‘गो-ग्रीन’ योजना पर्यावरण रक्षणासाठी देखील महत्वाची आहे. कागदी वीजबिलांचा वापर बंद केला तरी महावितरण मोबाईल अॅप व वेबसाईटवर ग्राहकांसाठी चालू व मागील वीजबिल तसेच वीजबिल भरण्याच्या पावत्या आदींची माहिती उपलब्ध आहे. वीजबिल तयार झाल्यानंतर लगेचच संगणकीय प्रणालीद्वारे ते ‘गो-ग्रीन’मधील ग्राहकांना ‘ई-मेल’द्वारे पाठविण्यात येत आहे. सोबतच ‘एसएमएस’द्वारे देखील वीजबिलाची माहिती देण्यात येत आहे. त्यामुळे प्रॉम्ट पेमेंटसह ऑनलाइनद्वारे लगेचच बिल भरणा करणे आणखी सोपे झाले आहे. सर्व लघुदाब ग्राहकांनी ‘गो-ग्रीन’ योजनेत सहभागी व्हावे असे आवाहन पुणे प्रादेशिक संचालक भुजंग खंदारे यांनी केले आहे.

पुणे प्रादेशिक विभाग अंतर्गत ‘गो-ग्रीन’ योजनेमध्ये पुणे जिल्ह्यातील 1 लाख 39 हजार 822 ग्राहक सहभागी झाले आहेत. त्यांची 1 कोटी 67 लाख 78 हजार 640 रुपयांचा वार्षिक फायदा होत आहे. तर, या योजनेतून सातारा जिल्ह्यातील 12 हजार 796 ग्राहकांचे 15 लाख 35 हजार 520 रुपये, सोलापूर जिल्ह्यातील 13 हजार 819 ग्राहकांचे 16 लाख 58 हजार 280 रुपये, कोल्हापूर जिल्ह्यातील 17 हजार 515 ग्राहकांचे 21 लाख 1 हजार 800 रुपये आणि सांगली जिल्ह्यातील 10 हजार 946 ग्राहकांच्या 13 लाख 13 हजार 520 रुपयांचा वीजबिलामध्ये वार्षिक फायदा होत आहे.

‘गो-ग्रीन’ योजनेत सहभागी झालेल्या वीजग्राहकांना छापील वीजबिलांची गरज भासल्यास त्यांना ईमेलद्वारे प्राप्त झालेले दरमहा वीजबिल संगणकात सॉफ्ट कॉपीमध्ये जतन करून ठेवता येईल. सोबतच संकेतस्थळावर चालू वीजबिलासह मागील 11 महिन्यांचे वीजबिले मूळ स्वरुपात उपलब्ध आहेत. आवश्यकतेप्रमाणे वीजग्राहकांना ते कधीही डाऊनलोड करण्याची किंवा मूळ स्वरूपात रंगीत प्रिंट करण्याची सोय आहे. वीजग्राहकांनी ‘गो-ग्रीन’ योजनेचा पर्याय निवडण्यासाठी महावितरणचे मोबाईल अ‍ॅप किंवा www.mahadiscom.in संकेतस्थळ येथे सुविधा उपलब्ध आहे.

पुणे :

बोपखेल व खडकीला जोडणाऱ्या मुळा नदीवरील पुलाचे काम पूर्ण झाले आहे. पुलाचे लवकरच लोकापर्ण करण्याचे नियोजन आहे. त्यामुळे नऊ वर्षानंतर बोपखेलवासीयांना दिलासा मिळणार आहे.

बोपखेल गावासाठी दापोडी येथील कॉलेज ऑफ मिलिटरी इंजिनिअरींग (सीएमई) हद्दीतून जाणारा नागरी रस्ता मुंबई उच्च न्यायालयाच्या आदेशानुसार 13 मे 2015 रोजी बंद करण्यात आला होता. त्यामुळे बोपखेल गावातील रहिवाशांना दापोडीकडे जाण्याकरीता पूर्वी लागणारे दोन किलोमीटरचे अंतर रस्ता बंद झाल्यामुळे सुमारे 16 किलोमीटर झाले. त्यामुळे बोपखेल येथील नागरीकांना पिंपरी-चिंचवड शहरात ये-जा करण्यासाठी भोसरी किंवा विश्रांतवाडी, खडकी मार्गावरुन सुमारे 15 ते 16 किलोमीटर अंतराचा वळसा घालावा लागत होता. त्यामुळे नागरिकांसह, विद्यार्थी व कामगारांची मोठी गैरसोय होत होती.

मुंबई उच्च न्यायालयाच्या आदेशानंतर बोपखेल ते खडकी असा मुळा नदीवर 1856 मीटर अंतराचा पुल बांधण्याचे काम महापालिकेने हाती घेतले. पूल व जोडरस्त्याचे काम टी ॲण्ड टी इन्फ्रा कंपनीने केले. चार वर्षांनंतर पुलाचे काम पूर्ण झाले आहे. छोटी कामे शिल्लक असून लवकरच पूर्ण होतील. त्यानंतर पूल वाहतुकीस खुला केला जाणार असल्याचे महापालिका आयुक्त शेखर सिंह यांनी सांगितले.

पुणे :

राज्यशासनाच्या सामाजिक न्याय व विशेष सहाय्य विभागामार्फत ग्रामीण व शहरी भागातील अनुसूचित जातीच्या नागरिकांसाठी राबविण्यात येत असलेल्या रमाई आवास घरकुल योजनेच्या लाभासाठी अर्ज करावेत, असे आवाहन समाज कल्याण सहायक आयुक्त विशाल लोंढे यांनी केले आहे.

अनुसूचित जातीच्या लोकांचे राहणीमान उंचावण्यासाठी व त्यांच्या निवाऱ्याचा प्रश्न सुटावा म्हणून ग्रामीण व शहरी भागांमध्ये त्यांना स्वतःच्या जागेवर अथवा कच्च्या घरांच्या ठिकाणी पक्के घर देण्यासाठी सन 2008 पासून रमाई आवास घरकुल योजना राबवण्यात येते.

या योजनेंतर्गत ग्रामीण भागातील लाभार्थ्यांसाठी उत्पन्न मर्यादा 1 लाख रुपये तर शहरी भागातील लाभार्थ्यांसाठी 3 लाख रुपयांपर्यंत आहे. सदर योजनेंतर्गत ग्रामीण भागात घरकुल बांधण्यासाठी प्रती घरकुल (शौचालय बांधकामासह) 1 लाख 32 हजार रुपये इतके अनुदान देण्यात येते. शहरी भागात प्रति घरकुल 2 लाख 50 हजार रुपये इतके अनुदान देण्यात येते. राज्य शासनाने सन 2024-25 या वर्षात या योजनेंतर्गत पुणे जिल्ह्यातील महानगरपालिका क्षेत्रासाठी 75, नगरपरिषद क्षेत्रासाठी 93, नगरपंचायत क्षेत्रासाठी 14 व ग्रामीण क्षेत्रासाठी 697 घरकुलांचे उद्दिष्ट मंजूर केले आहे.

या योजनेच्या लाभासाठी नागरी क्षेत्रातील लाभार्थ्यांनी संबंधित महानगरपालिका कार्यालय, नगर परिषद किंवा नगर पंचायत कार्यालयात तर ग्रामीण क्षेत्रातील लाभार्थ्यांनी पंचायत समितीच्या गट विकास अधिकारी कार्यालयाकडे विहित नमुन्यात अर्ज करावेत, असेही लोंढे यांनी सांगितले.

पुणे :

अटल सेतू, मुंबई-पुणे महामार्ग मिसिंग लिंक सारख्या (PMRDA News)प्रकल्पांमुळे पुणे आणि मुंबई ही महानगरे जवळ आली आहेत. त्याचा परिणाम म्हणून पुणे परिसरात मोठ्या प्रमाणावर विकास होत आहे. विकास प्रक्रियेच्या नियोजनाची जबाबदारी पुणे महानगर प्रदेश विकास प्राधिकरणाची असून प्राधिकरणाने पुणे शहराची सांस्कृतिक शहर म्हणून ओळख कायम ठेऊन शहराचा विकास व्हावा, अशा सूचना मुख्यमंत्री एकनाथ शिंदे यांनी दिल्या. मुख्यमंत्र्यांच्या अध्यक्षेतखाली आज पुणे महानगर विकास प्राधिकरणाची बैठक पार पडली. बैठकीत पीएमआरडीएच्या 3 हजार 838 कोटी 61 लाखांच्या अर्थसंकल्पास मंजूरी देण्यात आली.

मुंबईतील सह्याद्री अतिथीगृह येथे झालेल्या या बैठकीस मुख्य सचिव सुजाता सौनिक, वित्त विभागाचे अतिरिक्त मुख्य सचिव ओ. पी. गुप्ता, नियोजन विभागाचे अतिरिक्त मुख्य सचिव राजगोपाल देवरा, मुख्यमंत्र्याचे अतिरिक्त मुख्य सचिव विकास खारगे, मुख्यमंत्र्यांचे प्रधान सचिव ब्रिजेश सिंह, नगरविकास विभागाचे प्रधान सचिव असीम गुप्ता, पीएमआरडीएचे आयुक्त योगेश म्हसे आदि मान्यवर उपस्थित होते.

होईल, अशा प्रकारे तयार करावा. तसेच पीएमआरडीएच्या माध्यमातून तयार करण्यात येणाऱ्या परवडणाऱ्या घरांच्या बांधकामाची गुणवत्ता चांगली राहिल, याची काळजी घ्यावी. घरांच्या गुणवत्तेत हयगय करणाऱ्यांवर कठोर कारवाई करावी. तयार असणाऱ्या एकूण 4 हजार 886 घरांपैकी उरलेल्या 1 हजार 620 घरांची सोडत लवकरच काढण्यात यावी. तसेच दुसऱ्या टप्प्यातील 6 हजार घरांच्या बांधकामास वेग देण्यात यावा. सोबतच या घरांचे बांधकाम करतांना उद्यान, मोकळी जागा सारख्या विविध सुविधा उपलब्ध करून देण्यात याव्यात, असेही त्यांनी सांगितले.

पुणे महानगर प्रदेश विकास प्राधिकरणाच्या आजच्या बैठकीत 5 कोटी 75 लाखांचा शिलकीचा अर्थसंकल्प सादर करण्यात आला. यावेळी पुणे महानगर प्रदेशासाठी ठाणे शहराच्या धर्तीवर आपत्ती प्रतिसाद पथकाच्या स्थापनेस आणि 10 ठिकाणी नवीन अग्निशमन केंद्र निर्मितीस मान्यता देण्यात आली. 11 ठिकाणी मलनिस्सारण योजना तयार करण्यास, लोणावळा येथे टायगर व लायन्स पाँईंट येथे ग्लास स्कायवॉक तयार करण्यास या बैठकीत मंजूरी देण्यात आली.