दरवर्षी ५ हजार प्रशिक्षकांना प्रशिक्षण देण्याचे लक्ष्य- मंगलप्रभात लोढा

औंध :

कौशल्य, रोजगार, उद्योजकता व नाविन्यता विभाग, व्यवसाय शिक्षण व प्रशिक्षण संचालनालय यांच्यावतीने छत्रपती शिवाजी महाराज शासकीय औद्योगिक प्रशिक्षण संस्था, औेंध येथे आयोजित नवनियुक्त शिल्पनिदेशकांच्या प्रशिक्षणाचे कौशल्य विकास मंत्री मंगलप्रभात लोढा यांच्या हस्ते उद्घाटन करण्यात आले. दरवर्षी ५ हजार प्रशिक्षकांना प्रशिक्षण देण्याचे शासनाचे लक्ष्य असल्याचे मंत्री श्री.लोढा यांनी सांगितले.

यावेळी कौशल्य, रोजगार, उद्योजकता व नाविन्यता विभागाच्या अवर मुख्य सचिव मनीषा वर्मा, आयुक्त नितीन पाटील, व्यवसाय शिक्षण व प्रशिक्षण संचालनालयाच्या संचालक माधवी सरदेशमुख, माजी सनदी अधिकारी अविनाश धर्माधिकारी, टाटा स्ट्राईव्हचे मुख्य कार्यकारी अधिकारी अमेय वंजारी, चाणक्य मंडळाचे डॉ. भूषण केळकर उपस्थित होते.

मंत्री श्री. लोढा म्हणाले, राज्यात २०१५ मध्ये कौशल्य विकास विभाग सुरु करण्यात आला. औद्योगिक प्रशिक्षण संस्थेतील अधिकारी वर्ग आणि विविध संस्थेतील प्रशिक्षित प्रशिक्षकांनी ‘ट्रेन द टीचर्स’ उपक्रमात सहभाग घेऊन हा कार्यक्रम यशस्वी करावा. हा उपक्रम यशस्वी झाल्यास १ लाख विद्यार्थी यशस्वी होतील. प्रशिक्षण देण्यासाठी व्यावसायिक प्रशिक्षकांची निवड करण्यात आली आहे. आयटीआयमधील शिक्षणाला अभियांत्रिकी शिक्षणाप्रमाणे महत्त्व प्राप्त होईल यासाठी संस्थांचे आधुनिकीकरण व बळकटीकरण करण्यात येईल, असे त्यांनी सांगितले.

आयटीआयच्या आधुनिकीकरणासाठी वर्ल्ड बँकेने १३०० कोटी रुपये दिले आहेत. केंद्र शासनाने राज्यातील १०० आयटीआय दत्तक घेतल्या आहेत. तसेच यंदाच्या अर्थसंकल्पामध्ये आयटीआयच्या बळकटीकरणासाठी ५०० कोटी रुपयांची मागणी कौशल्य विकास विभागातर्फे करण्यात आली आहे. महाराष्ट्रातील मुला-मुलींना चांगला रोजगार मिळाला पाहिजे हा शासनाचा उद्देश आहे. काही एनजीओंच्या सहकार्याने अनेक ठिकाणी कौशल्य विकास केंद्र सुरु करण्यात आली आहेत. राज्यातील ४१९ आयटीआयचे नामकरण करण्यात आले आहे. जून २०२५ पासून नवीन शैक्षणिक धोरणानुसार आयटीआय मध्ये अभ्यासक्रम सुरु करण्यात येणार असल्याचे श्री. लोढा यांनी पत्रकारांशी संवाद साधताना सांगितले.

कार्यक्रमात मुख्यमंत्री देवेंद्र फडणवीस यांचा चित्रफितीच्या माध्यमातून प्रशिक्षणाच्या निमित्ताने शुभेच्छा संदेश दाखवण्यात आला. मुख्यमंत्री या शुभेच्छा संदेशात म्हणाले, समाजाच्या विविध क्षेत्रात काम करताना प्रत्येकाला वेळोवेळी प्रशिक्षणाची गरज भासते. तशीच ती गरज शिक्षकांनाही असते. ‘ट्रेन द ट्रेनर’ सारख्या संकल्पना म्हणूनच महत्त्वाच्या ठरतात. जेव्हा आपण ५ ट्रिलियन डॉलर अर्थव्यवस्थेकडे झेप घेण्याचे स्वप्न बाळगतो तेव्हा कुशल मनुष्यबळ हा त्यातील खूप मोठा आधार आहे. आणि कुशल मनुष्यबळ तयार करायचे असेल तर त्यांना प्रशिक्षण देणारे अधिक प्रशिक्षित असण्याची गरज आहे. या प्रशिक्षण कार्यक्रमाचा लाभ सुमारे १ हजार ३०० हून अधिक नवनियुक्त शिल्पनिदेशकांना होणार आहे. केवळ ज्ञान नाही तर वित्तीय व्यवस्थापन, सामाजिक बांधिलकी,व्यक्तीमत्व विकास इत्यादी बाबीही या प्रशिक्षणात अंतर्भूत करण्यात आल्या आहेत. या उपक्रमाचा ४१९ शासकीय औद्योगिक प्रशिक्षण संस्थांमधील विद्यार्थ्यांना लाभ मिळणार आहे.

उपमुख्यमंत्री अजित पवार यांनी संदेशाद्वारे प्रशिक्षणार्थ्यांना शुभेच्छा दिल्या. राज्यातल्या तरुणांना चांगले प्रशिक्षण मिळावे, त्यांच्यातल्या कौशल्याला चालना मिळावी, त्याचबरोबर उद्योग क्षेत्राला सुद्धा प्रशिक्षित मनुष्यबळ मिळावे या हेतूने राज्यात औद्योगिक प्रशिक्षण संस्थांची स्थापना करण्यात आली. राज्यातील उद्योगांना नवतंत्रज्ञान चालवणारे प्रशिक्षित, कुशल मनुष्यवळ देण्यासाठी राज्य शासनाने आयटीआय संस्थांचे आधुनिकीकरण आणि बळकटीकरणाचे काम हाती घेतले आहे. राज्याचे एक ट्रिलियन डॉलर अर्थव्यवस्थेचे उद्दिष्ट गाठण्यासाठी उद्योग क्षेत्र आणि त्यात काम करणाऱ्या प्रशिक्षित मनुष्यबळाने भरीव योगदान द्यावे, असे आवाहन श्री. पवार यांनी संदेशाद्वारे केले. यंदाच्या अर्थसंकल्पाच्या माध्यमातून उद्योग क्षेत्रासाठी भरीव तरतुदी करण्यात येतील. त्यामुळे राज्याच्या उत्पन्नात भर तर पडेलच आणि हजारो तरुणांच्या हाताला रोजगार मिळेल, असेही ते म्हणाले.

युरोपियन देशांना कुशल मनुष्यबळाची मोठी आवश्यकता आहे. हे कुशल मनुष्यबळ पुरविण्यासाठी पहिलं पाऊल महाराष्ट्र शासनाने टाकलं आहे. या उपक्रमांतर्गत विद्यान, तंत्रज्ञान, माहिती तंत्रज्ञान, अभियांत्रिकी, बांधकाम, ऊर्जा व पर्यावरण, आरोग्य, हॉटेल व्यवस्थापन अशा प्रमुख क्षेत्रांसाठी महाराष्ट्रातून कुशल मनुष्यबळ पुरविण्यात येणार आहे. राज्य शासनाकडून प्रधानमंत्री कौशल्य विकास योजना, स्टार्टअप इंडिया, मेक इन इंडिया आणि राज्यस्तरीय कौशल्य विकास उपक्रमांच्या माध्यमातून तरुणांना प्रोत्साहन दिले जात आहे. तरूणांना जागतिक स्पर्धेसाठी सज्ज करणे, त्यांना योग्य प्रशिक्षण आणि मार्गदर्शन करणे असे शासनाने लक्ष्य असून ‘ट्रेन द टीचर्स’ उपक्रम त्यादिशेने महत्त्वाचे पाऊल आहे, असेही श्री. पवार यांनी संदेशात म्हटले आहे.

यावेळी शासकीय औद्योगिक प्रशिक्षण संस्था, छत्रपती संभाजीनगर, अमरावती व इंडो-जर्मन टूल रुम, छत्रपती संभाजीनगर येथील प्रशिक्षणाचे आभासी पध्दतीने उद्घाटन करण्यात आले. कार्यक्रमात आय. टी. आय. मध्ये सीएसआर अंतर्गत उल्लेखनीय काम करणाऱ्या नामांकित कंपन्यांचा स्मृतीचिन्ह देऊन सन्मान करण्यात आला.

यावेळी या वेळी पुणे विभागाचे सहसंचालक चंद्रशेखर ढेकणे, मुंबईचे सहसंचालक तथा माजी संचालक सतीश सुर्यवंशी, उपसंचालक सचिन धुमाळ, किशोर उबाळे, उदयकुमार सुर्यवंशी व पुणे विभागातील अधिकारी उपस्थित होते.

औंध :

औंध डि.पी.रोड येथील डॉ. बाबासाहेब आंबेडकर यांचा अर्धाकृती पुतळा पूर्णाकृती करा व प्रधानमंत्री नरेंद्र मोदी यांनी 2016साली स्मार्टसिटी अंतर्गत उद्घाटन केलेला झोपडपट्टी SRA प्रकल्प 500 स्क्वे.फूट स्मार्ट नवीन सुविधायुक्त घरे द्यावीत अशी मागणी केंद्रीय मंत्री, पुण्याचे खासदार मुरलीधर मोहोळ यांच्याकडे रिपब्लिकन पक्षाचे पुणे शहर नेते रमेश ठोसर यांच्यासह कार्यकर्त्यांनी खासदार जनसंपर्क अभियानात मागणी केली.

औंध डि.पी.रोड येथील डॉ.बाबासाहेब आंबेडकर वसाहत झोपडपट्टीचे पुणे शहरातील देशातले पहिलं मॉडेल म्हणून 2016साली प्रधानमंत्री नरेंद्र मोदी यांनी म्हाळुंगे येथील स्टेडियम येथे प्रकल्पाचे ऑनलाईन उद्घाटन केले होते. आज 9 वर्षे उलटून गेली तरी काम रखडलेले आहे. औंध भागात स्मार्ट सिटीतील रस्ते, फुटपाथ, मोठमोठे केलेले आहेत.

स्मार्ट सिटीतील झोपडपट्टी कोंबड्यांच्या खुराड्यासारखी न बांधता ५०० चौरस फूटाचे बांधकाम, बाल्कनी असलेली, पिण्याच्या पाण्याचे २४ तास उत्तम व्यवस्था असावी, सौरऊर्जा मार्फत सुध्दा वीज व्यवस्था असावी, उद्यान, लायब्ररी, नवीन होणारी इमारत ६ मजली असावी. तसेच झोपडपट्टी शेजारी डॉ.बाबासाहेब आंबेडकर चौकात असलेला डॉ.बाबासाहेब आंबेडकर यांचा अर्धाकृती पुतळा पूर्णाकृती करावा.,असे मागण्यांचे निवेदन केंद्रीयमंत्री,व पुण्याचे खासदार मुरलीधर मोहोळ यांना रमेश ठोसर नेते रिपाई पुणे शहर यांच्या वतीने देण्यात आले.

यावेळ आमदार सिद्धार्थ शिरोळे, माजी नगरसेवक आनंद छाजेड उपस्तिथ होते. अभिमान शिंदे, निलेश ठोसर, अदित्य औचार, उमेश ठोसर इत्यादी कार्यकर्त्यांनी समक्ष भेटून मागण्यांचे निवेदन दिले .

पुणे :

मनसेचे छत्रपती शिवाजीनगर विधानसभा मतदार संघाचे विभाग उपाध्यक्ष गौरव खेडेकर यांनी त्यांच्या वाढदिवसाचे अवचीत्य साधून साधारण ४०० दिव्यांग विद्यार्थ्यांना शैक्षणिक शालेय साहित्य वाटप केले.

सामाजिक क्षेत्रात गौरव खेडेकर हे लहानपणा पासून सामाजिक रित्या सक्रिय आहेत. परंतु महाराष्ट्र नवनिर्माण सेनेत त्यांनी प्रवेश केल्यानंतर त्यांचा राजकीय प्रवास सुरू झाला. त्या माध्यमातून सध्या विविध उपक्रम राबवत असून याचा फायदा नागरिकांना होत आहे, असे शाखा अध्यक्ष अभिजित लाड यांनी सांगितले. यावेळी शुभम देसाई, हृतिक फर्नांडिस, करण जनार्धन आदी उपस्थित होते.

आगामी महानगरपालिकेच्या निवडणुकीच्या पार्श्वभूमी केलेल्या सामाजिक कामाचा आपल्या पक्षाला फायदा कसा होईल याकडे लक्ष देऊन सध्या कामे सुरू आहेत. सर्वसामान्य जनतेला भेटून त्यांच्या समस्या सोडवण्यासाठी काय करता येईल जेने करुन आपण अधिक लोकांपर्यंत पोहोचू या साठी नेहमी ते तत्पर राहणार असल्याचे मत यावेळी गौरव खेडेकर यांनी मांडले.

पुणे :

सोशल मीडियावर रील्स स्टार मोठ्या प्रमाणात वाढत्या कारणाने बेटिंग ॲप्स स्वतःच्या फेक लाइफस्टाइल दाखवून लोकांना पैसे जुगार खेळून डबल करा तसेच मोठ्या गाड्या घेण्याचे स्वप्न दाखवून लोकांची फसवणूक केली जाते आहे. याबाबत संबंधितावर सायबर क्राईम अंतर्गत कारवाई करण्याात यावी असे निवेदन मनसेच्या वतीने पोलिसांना देण्यात आले आहे.

या सर्व फेक गोष्टीमुळे सामान्य नागरिक भरकटला जात आहे, व त्याला आर्थिक नुकसानी मोठ्या प्रमाणात सोसावे लागत आहे. यामुळे अशा प्रलोभनांना बळी न पडता नागरिकांची जनजागृती आवश्यक आहे. अशा फसव्या रील करणाऱ्यांवर कारवाई केली जावी यामुळे या रीलस्टार वर वचक बसेल असे मत गौरव खेडेकर यांनी व्यक्त केले.

या बद्दल डेक्कन पोलिस चौकीत निवेदन देऊन तक्रार करण्यात आली. मनसेचे छत्रपती शिवाजीनगर विधानसभा मतदार संघाचे विभाग उपाध्यक्ष गौरव खेडेकर यांनी हे निवेदन डेक्कन पोलिस चौकीत दिले. तसेच लवकरात लवकर ह्या खोट्या रिल्स स्टार्स वर कारवाई करावी व त्यांचे इन्स्टाग्राम अकाऊंट स्थगित करावे असे जेणेकरून सामान्य नागरिकांची फसवणूक होणार नाही असे निवेदन देण्यात आले आहे.

औंध :

गुरुदेव दत्त जन्म सोहळ्यानिमित्त भव्य रक्तदान शिबीर आयोजित करण्यात आले होते या सोहळ्याला पिंपरी चिंचवड ब्लड सेंटर यांच्या मार्गदर्शनाखाली शिबीर घेण्यात आले.

या सोहळ्याला दत्त भक्त आणि औंध गावांतील तरुण आणि महिला यांचा उस्फुर्त प्रतिसाद मिळाला .या निमित्ताने प्रमुख उपस्थिती सनी निम्हण, अँड मधुकर मुसळे नगरसेविका अर्चना मुसळे मनसे नेते रणजित शिरोळे,नाना वाळके औंध गाव ह.भ.प सोमनाथ बोर्ड, ह.भ.प.अमित क्षिरसागर, मनसे विभाग अध्यक्ष विनायक कोतकर, दत्ता रणदिवे विश्वस्त मंडळ अध्यक्ष योगेश जुनवणे,  विश्वस्त महेंद्र, जुनवणे किरण लांडगे बरेच मान्यवर उपस्थित होते.

११६ दत्त भक्त परिवारातर्फे रक्तदान करण्यात आले, पुढे भविष्यात यांच्या मार्फत आरोग्य शिबीर आणि विविध समाजोपयोगी उपक्रम हाती घ्यायचा मानस आहे.सूर्य मुखी दत्त मंदिर अध्यक्ष अँड सतिश रानवडे यांनी याचे आयोजन केले होते . तसेच या रक्तदान शिबिराचे संपूर्ण नियोजन मनसे नेते निलेश जुनवणे यांनी केले तसेच त्यांना अभिषेक जेऊर यांचे सहकार्य लाभले.

बोपोडी :

बोपोडी येथील व्हिजन नेक्स्ट डोळ्यांचे हॉस्पिटल मध्ये शासकीय नियमांचे उल्लंघन करून जनतेची लूट करीत असले बाबत महानगर पालिका आरोग्य अधिकाऱ्यांना मनसेच्या वतीने निवेदन देण्यात आले.

भाऊ पाटील रोड बोपोडी, येथे जनतेच्या पैशातून जनतेच्या सोयीसाठी एक अद्ययावत डोळ्यांच्या हॉस्पिटलची उभारणी केलेली आहे. सदर हॉस्पिटल सध्या व्हिजन नेक्स्ट फाऊंडेशन ( दत्तात्रय वळसे पाटील आय हॉस्पिटल) तर्फे चालविले जाते. सदर हॉस्पिटलची धर्मादाय विभागाकडे नोंद आहे. तथापि सदर हॉस्पिटलने तेथे कोठेही धर्मादाय अशी पाटी लावलेली नाही.

तसेच हॉस्पिटलमध्ये औँधरोड, बोपोडी येथील गरीब नागरिक डोळ्याच्या मोती बिंदूच्या उपचारासाठी गेल्यास हॉस्पिटलचे डॉक्टर त्यांना हे खाजगी हॉस्पिटल असून मोतीबिंदूच्या एका डोळ्याच्या शस्रक्रियेसाठी साधारणपणे रूपये १३ हजार ते ३१ हजार रूपयापर्यंत कोटेशन देत असल्याची माहिती मनसेचे मयूर बोलाडे यांनी दिली.

नागरिकांनी सदर हॉस्पिटल हे धर्मादाय आयुक्तांकडे नोंदणीकृत असून येथे त्याप्रमाणे सवलतीच्या दरात शस्त्रक्रिया का होत नाहीत अशी विचारणा केल्यास, यावर हॉस्पिटलचे प्रशासन सदर मोतीबिंदूची शस्त्रक्रिया आमच्या हॉस्पिटलमध्ये होत नाही असे कारण सांगतात.

पुणे महानगरपालिकेच्या आरोग्य अधिकारी डॉ.निना बोराडे यांना निवेदन देण्यात आले.तरी व्हिजन नेक्स्ट हॉस्पिटलमध्ये चाललेल्या प्रकाराची गांभियनि दखल घेऊन त्याची सखोल चौकशी करून, सामान्य नागरिकांसाठी असलेल्या सर्व योजना तेथे राबविण्यात याव्यात अन्यथा सदर गैरप्रकाराविरूद्ध मनसे पक्षाच्या वतीने तीव्र जन आंदोलन उभारू असे निवेदन मनसेचे मयुर राम बोलाड़े (शाखा अध्यक्ष, वॉर्ड क्र. २६ छत्रपती शिवाजीनगर मतदार संघ) यांच्या वतीने देण्यात आले आहे.

बोपोडी :

पूर्व वैमनस्यातून तरुणावर कोयत्याने वार करण्यात आल्याची घटना बोपोडीतील भाऊ पाटील रस्त्यावर घडली. याप्रकरणी एकाला खडकी पोलिसांनी अटक केली. संदीप सुनील कवाळे (वय २७, रा. डाॅ आंबेडकर चौक, औंध रस्ता) असे जखमी झालेल्याचे नाव आहे. याप्रकरणी अभिजीत प्रदीप मोरे (वय ३८, रा. चव्हाण वस्ती, बोपोडी) याला अटक करण्यात आली. याबाबत कवाळे याने खडकी पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, कवाळे आणि मोरे यांच्यात काही दिवसांपूर्वी वाद झाले होते. शुक्रवारी रात्री साडेअकराच्या सुमारास कवाळे हा बोपोडीतील भाऊ पाटील रस्त्याने निघाला होता. त्यावेळी आरोपी मोरेने त्याला साई मंदिरासमोर अडवले. त्याने त्याला शिवीगाळ केली. त्याच्यावर कोयत्याने वार केले. गंभीर जखमी झालेल्या कवाळेला पोलिसांनी तातडीने रुग्णालयात दाखल केले. पसार झालेल्या मोरेला पोलिसांनी अटक केली असून, सहायक पोलीस निरीक्षक देशमुख तपास करत आहेत.

तसे पहिले तर शहरात खून, खुनाचा प्रयत्न, मारहाण अशा गंभीर गुन्ह्याच्या घटनांमध्ये वाढ झाली आहे. गेल्या आठवड्यात शहरात पाच खुनाच्या घटना घडल्या. किरकोळ वादातून हल्ले करण्याच्या घटना वाढल्या असून, कायदा आणि सुव्यवस्थेचा प्रश्न ऐरणीवर आला आहे.

औंध :

७५ व्या संविधान‌ महोत्सव दिनानिमित्त बहुजन उद्धारक सामाजिक संस्थेच्या वतीने औंध मध्ये भारताचे संविधान पुस्तके वाटप व प्रस्तावनेचे वाचन करून पोलिस अधिकार्यांच्या उपस्थितीत कार्यक्रम उत्साहात साजरा करण्यात आला.

औंध डि.पी.रोड. डॉ बाबासाहेब आंबेडकर चौका मध्ये बहुजन उद्धारक सामाजिक संस्थेच्या वतीने संविधानाच्या ७५ व्या महोत्सव दिनानिमित्त डॉ. बाबासाहेब आंबेडकर यांच्या अर्धाकृती पुतळ्याला पुष्पहार अर्पण करून रमेश ठोसर अध्यक्ष बहुजन उद्धारक सामाजिक संस्था यांच्या हस्ते वरिष्ठ पोलीस निरीक्षक विजयनंद पाटील यांचा भारताचे संविधान हे पुस्तक देऊन व पुष्पगुच्छ देऊन सन्मान करण्यात आला.

या कार्यक्रमात सामुदायिकरित्या भारताच्या संविधानाच्या उद्देशिकेचे वाचन करण्यात आले. यावेळी पोलिस उपनिरीक्षक प्रणिल चौगुले, अजय निरवणे, पै.निलेश ठोसर, हिराबाई घोडेराव, शुभम कांबळे, किरण मोरे , गोकुळ ठोसर , स्वप्निल पालके, रवि भालेराव, छबूताई उदागे, भारती जगताप , छाया ठोसर व अंगणवाडी शिक्षिका इत्यादी मान्यवर उपस्थित होते.

औंध :

परिहार चौकात बेकायदेशीर अनधिकृतितरित्या टाकण्यात आलेल्या टपऱ्यांबाबत वारंवार तक्रार करून ही कारवाई होत नसल्याने, अखेरीस माजी नगरसेविका अर्चना मुसळे व भाजपा प्रवक्ता अँड.मधुकर मुसळे व औंध येथील नागरिकांनी सोमवार दिनांक ३० सप्टेंबर रोजी महापालिका समोर आंदोलन केले. या आंदोलनात भ्रष्ट अधिकाऱ्यांची रावणाची प्रतिकृती ची गाढवावरून धिंड काढण्यात आली. याची दखल घेत पालिका प्रशासनाने मंगळवारी दि. १ ऑक्टोंबर रोजी सकाळीच ही कारवाई करून येथील रस्ता मोकळा केला.

परिहार चौक औंध येथे औंध बाणेर क्षेत्रीय कार्यालय व अतिक्रमण अनधिकृत बांधकाम निर्मूलन विभाग यांनी महापालिका आयुक्त राजेंद्र भोसले व मा महापालिका अतिरिक्त आयुक्त पृथ्वीराज बी पी यांच्या आदेशानूसार, परीहार चौक ते वेस्टेंड मॉल येथे नव्याने उभारण्यात आलेले ३१ टपऱ्यांवर वर कारवाई करण्यात आली.

सदर ठिकाणी काही दिवसांपूर्वी तेथील पथारी व्यावसायिकांनी आपले टपऱ्या काढून घेतले. व पुन्हा नव्याने सुमारे ३१ नवीन टपऱ्या उभारण्यात आले होते. त्या ठिकाणी नागरिकांच्या वारंवार तक्रारी वाढत असल्याने अतिक्रमण विभागाने धडक कारवाई केली.

दि. १ ऑक्टोंबर रोजी पहाटे ५ वाजता सर्व यंत्रणा क्रेन -२, हायवा- ५, ब्रेकर -२, गॅस कटर -३, JCB -५, ओपन ट्रक -७, तसेच बिगारी १००, MSF, २०, पोलीस -२२ सहा. अतिक्रमण निरीक्षक -२२, अतिक्रण निरीक्षक ०४ व वरिष्ठ अधिकारी अतिक्रमण विभागाचे उप-आयुक्त सोमनाथ बनकर, औंध बाणेर क्षेत्रीय कार्यालय सहाय्यक आयुक्त गिरीश दापकेकर स्थानिक सहाय्यक पोलिस निरीक्षक बाबासाहेब झरेकर अधिकारी वर्ग उपस्थीत होते. विभागीय निरीक्षक श्री अवघडे, श्री साबळे, क्षेत्रीय निरीक्षक श्री नरूले, श्री जाधव, श्री तळेकर यांच्या नियंत्रणात कारवाई करण्यात आली. येथील सर्व स्टॉल अतिक्रमण विभागाने जप्त केले तसेच संपूर्ण रस्ता पदपथ मोकळा करण्यात आला.

आंदोलनानंतर आली महापालिका प्रशासनाला जाग आल्याची नागरिकांमध्ये चर्चा.

पुणे :

राष्ट्रपती द्रौपदी मुर्मू यांच्या हस्ते आमदार सिद्धार्थ शिरोळे यांना ‘उत्कृष्ट भाषण’ पुरस्कार आज प्रदान करण्यात आला. मुंबई येथील विधानभवनामधील मध्यवर्ती सभागृहात आयोजित कार्यक्रमात हा पुरस्कार प्रदान सोहळा पार पडला. राज्य सरकारच्या राष्ट्रकुल संसदिय मंडळाच्या वतीने 2021-22 या वर्षातील उत्कृष्ट भाषण पुरस्कारासाठी शिरोळे यांची निवड करण्यात आली होती

राज्यपाल सी पी राधाकृष्णन, मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार विधानसभा अध्यक्ष ॲड.राहुल नार्वेकर, विधानपरिषदेच्या उपसभापती डॉ नीलम गोऱ्हे, संसदीय कार्यमंत्री चंद्रकांत पाटील, विधानसभा उपाध्यक्ष नरहरी झिरवळ आणि विरोधी पक्ष नेते अंबादास दानवे आदी मान्यवर यावेळी व्यासपीठावर उपस्थित होते.

सिद्धार्थ शिरोळे यांनी विधानसभेत छत्रपती शिवाजीनगर मतदार संघातील विविध प्रश्न मांडत असतांनाच राज्यातीलही अनेक विषय सभागृहात प्रभावीपणे मांडले होते. समस्या मांडत असतांनाच त्या सोडवण्यासाठीच्या सूचना करीत सभागृहात छाप पाडणार्या शिरोळे यांना उत्कृष्ट भाषण’ पुरस्कार प्रदान करीत गौरवण्यात आले. सिद्धार्थ शिरोळे यांनी विद्यापीठ चौकातील वाहतूक कोंडी, खडकी कॅन्टोनमेंटचा महापालिका हद्दीत समावेश, नदीतील जलपर्णी, मराठा आरक्षण, मतदार संघातील पूरग्रस्त वसाहती यांसोबतच इतर अनेक सभागृहात प्रभावी मांडणी केली.