ओव्हल :
रोहित शर्माच्या नेतृत्वाखाली, भारतीय क्रिकेट संघाने आपला चौथा साखळी सामना बांगलादेशविरुद्ध ॲडलेड ओव्हल येथे खेळला. पावसाने व्यत्यय आणलेल्या या सामन्यात टीम इंडियाने 5 धावांनी विजय मिळवला आणि या विजयासह 2 गुणांची कमाई करत टीम इंडियाने उपांत्य फेरीच्या दिशेने एक पाऊल पुढे टाकले.
पॉइंट टेबलमध्ये टीम इंडिया पहिल्या क्रमांकावर आहे
भारताचे आता एकूण 6 गुण झाले असून हा संघ आता गुणतालिकेत ब गटात पहिल्या क्रमांकावर आला आहे. आता टीम इंडियाचा उपांत्य फेरी गाठण्याचा मार्ग सुकर झाला आहे. भारताचा आणि शेवटचा सामना आता झिम्बाब्वे विरुद्ध आहे, अशा परिस्थितीत भारताला दोन गुण मिळवणे अवघड नसावे आणि असे झाल्यास संघाचे 8 गुण होतील आणि भारतीय संघ उपांत्य फेरीत पोहोचेल.
या सामन्यात बांगलादेशचा कर्णधार शकीब अल हसनने नाणेफेक जिंकून प्रथम गोलंदाजी करण्याचा निर्णय घेतला आणि भारताला फलंदाजीसाठी आमंत्रित केले. प्रथम फलंदाजी करताना केएल राहुल आणि विराट कोहलीच्या अर्धशतकांच्या जोरावर भारताने 20 षटकांत 6 बाद 184 धावा केल्या.
यानंतर बांगलादेश संघाने 7 षटकांत 66 धावा केल्या आणि पाऊस सुरू झाला. पावसामुळे सामना 16 षटकांचा करण्यात आला आणि बांगलादेशला विजयासाठी 151 धावांचे नवीन लक्ष्य देण्यात आले. प्रत्युत्तरात बांगलादेश संघाने 16 षटकांत 6 बाद 145 धावा केल्या आणि भारताने 5 धावांनी विजय मिळवला. भारताने डकवर्थ लुईस नियमाच्या आधारे हा विजय मिळवला.
केएल राहुल आणि रोहित शर्मा भारताकडून डावाची सुरुवात करण्यासाठी मैदानात उतरले पण रोहितने केवळ 2 धावा केल्या आणि हसन महमूदने बाद केले. राहुल आणि कोहली यांनी दुसऱ्या विकेटसाठी अर्धशतकी भागीदारी केली, मात्र 50 धावा पूर्ण केल्यानंतर केएल राहुलही शाकिबच्या चेंडूवर मुस्तफिझूरकडे झेलबाद झाला. सूर्यकमार यादव 30 धावा करून शकीब अल हसनच्या गोलंदाजीवर बाद झाला. हार्दिक पांड्या 6 धावा करून बाद झाला.
विराट कोहलीने 37 चेंडूत 7 चौकारांच्या मदतीने अर्धशतक पूर्ण केले. दिनेश कार्तिकने 7 धावा केल्या आणि तो धावबाद झाला. यानंतर अक्षर पटेल 7 धावा करून झेलबाद झाला. या सामन्यात कोहलीने 44 चेंडूत नाबाद 64 धावा केल्या, तर अश्‍विनही 13 धावांवर नाबाद राहिला.
बांगलादेशचा सलामीवीर फलंदाज लिटन दासने या कालावधीत 21 चेंडूत 3 षटकार आणि 6 चौकार मारून अर्धशतक पूर्ण केले. या सामन्यात बांगलादेशची पहिली विकेट पडली, लिटन दास 27 चेंडूत 60 धावा करून बाद झाला. 21 धावा करणाऱ्या शांतोला शमीच्या चेंडूवर सूर्यकुमार यादवने झेलबाद केल्याने बांगलादेशची दुसरी विकेट पडली. अफिफ हुसैन 3 धावा करून अर्शदीप सिंगच्या चेंडूवर सूर्यकुमारकरवी झेलबाद झाला.
कर्णधार शाकिब अल हसन अर्शदीप सिंगच्या चेंडूवर दीपक हुडाच्या हातून झेलबाद झाला. यासिर अलीला हार्दिक पांड्याने एका धावेवर अर्शदीपच्या हाती झेलबाद केले. मोसाद्देकला हार्दिक पांड्याने 6 धावांवर क्लीन आउट केले. भारताकडून हार्दिक आणि अर्शदीप सिंग यांना २-२ तर मोहम्मद. शमीला ब्रेकथ्रू मिळाला.
